Home දේශීය පුවත් ‘සෞභාග්‍යයේ දැක්ම’ ප්‍රතිපත්ති ප්‍රකාශයේ විප්ලවීය වෙනස නියතවම සිදු කරනවා

‘සෞභාග්‍යයේ දැක්ම’ ප්‍රතිපත්ති ප්‍රකාශයේ විප්ලවීය වෙනස නියතවම සිදු කරනවා

by Hela news
  • කොවිඩ් නිසා පොරොන්දු ඉටු කිරීමට නොහැකි වූවත් ජනතා විශ්ව­ාසය සුරකිනවා
  • ඇතැමුන් මිලිටරීකරණය ඉල්ලුවත් මා ප්‍රජාතන්ත්‍රවාදය සුරැකුවා
  • කාබනික වගාව-පුනර්ජනනීය බලශක්තිය ‘සෞභාග්‍යයේ දැක්ම’ ප්‍රතිපත්තියයි
  • චිත්‍ර ඇන්ද වගා කළ තරුණයන්ට රට හදන්න යළි ආරාධනා කරනවා

ජනපති

‘සෞභාග්‍යයේ දැක්ම’ ප්‍රතිපත්ති ප්‍රකාශයෙන් සඳහන් කළ විප්ලවීය වෙනස නියත වශයෙන්ම කරන බවත් අභියෝගය ජය ගැනීමට කැප වීමෙන් ක්‍රියා කරන බවත් ජනාධිපති ගෝඨාභය රාජපක්ෂ මහතා අවධාරණය කළේය.

ඒ මහතා මෙසේ පැවසුවේ මාර්ග 1500ක් එකම දිනකදී ජනතා අයිතියට පත්කිරීම වෙනුවෙන් මණ්ඩාඩුව මහජන ක්‍රීඩාංගණයේ පෙරේදා (6) පැවති උත්සවය අමතමිනි.

ජනතාව ඉල්ලා සිටියේ විප්ලවීය වෙනසක් හෙයින් එය සිදු කිරීමේ දී අපහසුතා සහ බාධකවලට මුහුණදීමට සිදු වූවත් එය නොඅඩුව ඉටු කරන බවද ජනාධිපතිවරයා සඳහන් කළේය.

ලෝකයේ සෙසු රටවලට මෙන්ම ශ්‍රී ලංකාවට ද කොවිඩ් වසංගතයට මුහුණ දීමට සිදු වූ බවත් වැටී තිබූ ආර්ථිකයක් හමුවේ හඳුනා නොගත් වසංගතයක් සමඟ දැවැන්ත අභියෝගයකට මුහුණ දෙමින් ජනතාවගේ ජීවිතාරක්ෂාව වෙනුවෙන් සැලසුම් රැසක් ක්‍රියාත්මක කළ බවත් රාජපක්ෂ මහතා කීවේය.

එහිදී තමා දුන් පොරොන්දු එලෙසින්ම ඉටු කිරීමට නොහැකි වූ බව පෙන්වා දුන් ජනාධිපතිවරයා එහෙත් එහි කිසිඳු අඩුවක් නොතබා ජනතාව තමා කෙරෙහි තැබූ විශ්වාසය ආරක්ෂා කරන බව පැවසීය.

සමහර අය කියනවා අප බලාපොරොත්තු වුණේ මිලටරිකරණය වුණු මිනිහෙක්, ගෝඨාභය කෙනෙක් කියා. මට පුළුවන්. හැබැයි ඒ කියන්නේ ගොවි මහත්මයට කාබනික පොහොර භාවිතා කරන්න කිව්වම මට පුළුවන් බෙල්ලෙන් අල්ලලා පාවිච්චි කරපන් කියන්න. මට එහෙම අවශ්‍යතාවක් නැහැ. සමහර අය කිව්වා මා ආවොත් ප්‍රජාතන්ත්‍රවාදය නැති වේවි කියා. ඒ අයම කියනවා අයියෝ ඔහොම කෙනෙක් නෙවෙයි හමුදාවේ වගේ එක්කෙනෙක් ඕනේ කියා. මට ඕන්නම් ඒක කරන්න පුළුවන්. නමුත් මේක ප්‍රජාතන්ත්‍රවාදී රටක් යැයිද ජනාධිපතිවරයා කීවේය.

මා අභයාරාමයේ මුරුත්තෙට්ටුවේ ආනන්ද හාමුදුරුවන්ට කොළඹ විශ්විද්‍යාලයේ කුළපතිකම දුන්නා. උන්වහන්සේ අපව බලයට ගෙන්න වැඩ කළා. මහින්ද රාජපක්ෂ ජනාධිපතිවරයගේ කාලයේ සිට උන්වහන්සේ වැඩ කළා. ඒක ඇත්ත. පසුගිය කාලයේ යම් යම් හේතු හින්දා උන්වහන්සේ අපට විරුද්ධව කතා කළා. විජේදාස රාජපක්ෂ මහත්මය ගියා උපදෙස් ගන්න. සජිත් ප්‍රේමදාස මහත්මයා ගියා උපදෙස් ගන්න, රනිල් වික්‍රමසිංහ මහත්මය ගියා උපදෙස් ගන්න.ස්ටාර්ලිංන්ද කවුද කියන කෙනා ගියා උපදෙස් ගන්න. මහින්ද ජායසිංහ කියන පුද්ගලයත් උපදෙස් ගන්න ගියා. ඔය සියලුදෙනා උපදෙස් ගන්න ගියේ උන්වහන්සේ ළගට. හැබැයි උන්වහන්සේව කුළපති කළාම ඒකට සුදුසු නැහැ. ඔක්කොම රැළ පිටින් ගිහින් උපදෙස් ගත්තේ එතනින් යැයිද රාජපක්ෂ මහතා කියා සිටියේය.

ඥානසාර හාමුදුරුවෝ පත් කළ කියලා විවේචනය කරනවා. මා දන්නවා අවුරුදු පහක් තිස්සේ උන්වහන්සේ තමයි එක රටක්, එක් නීතියක් කියන සංකල්පය ගැන කතා කළේ. මා උන්වහන්සේට කතා කර ඔබ වහන්සේ මෙක ගැන අවුරුදු පහක් කතා කළා නේ. ඔබ වහන්සේ හදලා දෙන්න ඒ සංකල්පය. ඔබ වහන්සේ ඒක හදලා දුන්නම මා ඒක දෙන්නම් අධිකරණ ඇමැතිවරයට එහි යම් යම් අඩුපාඩු තිබෙනව නම් හදලා පාර්ලිමේන්තුවට ඉදිරිපත් කරන්න. ඒකයි අවශ්‍යතාව. ඒකයි මට ඕනෑ. ඒකටත් විපක්ෂය දොෂාරෝපණය කරමින් සිටින බවද ජනාධිපතිවරයා පැවසීය.

කොවිඩ් වසංගතය හේතුවෙන් සංචාරක කර්මාන්තය බිඳ වැටිණා. ඉන් අහිමි වූ ඝෘජු සහ වක්‍ර රැකියා සංඛ්‍යාව මිලියන 3කට ආසන්න වෙනවා. ලක්ලක්ෂ පනස්දහසකට අධික පිරිසකට විදේශ රැකියා අවස්ථා අහිමි වූ අතර ඉහළම සිට පහළම ව්‍යාපාරිකයා දක්වා සියලුදෙනාගේ ආර්ථිකයට බාධා එල්ල වුණා. මේ සමඟ ඇති වූ දැවැන්ත ආර්ථික බිඳ වැටීම මත වූවද සංවර්ධන වැඩකටයුතු අඛණ්ඩව සිදු කළා. සියලුම රාජ්‍ය සේවකයන්ට නියමිත දිනට වැටුප් ගෙවනු ලැබුවා. ඩොලර් මිලියන 4ක් වූ විදේශ ණය වාරික නියමිත පරිදි ගෙවීමට පියවර ගත්තා. කොවිඩ් රෝගී පවුල් වෙනුවෙන් සහ නිරෝධායනයට ලක් වූ සියලුදෙනා වෙනුවෙන් ආධාර මුදල් ලබාදුන්නා. වී වලට සහතික මිලක් ලබාදීමට කටයුතු කළා. මේ සියල්ල සිදු කිරීමට වූයේ දැවැන්ත ආර්ථික අර්බුද හමුවේ බව ජනාධිපතිවරයා සිහිපත් කළේය.

කාබනික වගාව මෙන්ම පුනර්ජනනීය බලශක්ති උත්පාදනය සඳහා වූ වෙනස ඉටු කිරීමට කිසි විටෙකත් පසුනොබසින බවද ජනාධිපතිවරයා පැවසීය.

මුං, කව්පි, උදු, කහ ඇතුළු බෝග 16 ආනයනය කිරීම සම්පූර්ණයෙන් නතර කළා. අද එහි ප්‍රතිඵල ගොවීහු භූක්තිවිඳිමින් සිටිනවා. කුරුඳු, ගම්මිරිස්, කහ සඳහා ඉහළ මිලක් ගොවියාට ලැබෙමින් පවතිනවා. ගොවියාගේ අතට ලැබෙන එම ආදායම අඩු නොකිරීමටත්, පාරිභෝගිකයාව ආරක්ෂා කිරිමටත් පියවර ගන්නා බව ජනාධිපතිවරයා අවධාරණය කළේය.

මෙම තත්ත්වය අවබෝධ කරගෙන හරිත කෘෂි අභියෝගය ජය ගැනීමට එක්වන්නැයි සියලු ගොවි ජනතාවගෙන් ඉල්ලා සිටී ජනාධිපතිවරයා ගොවීන්ට හෝ ජනතාවට බලපෑම් කර එම වෙනස සිදු කිරීමට තමා අපේක්ෂා නොකරන බව ද කීවේය.

තමා බලයට පත්වීමත් සමග තරුණයන් තාප්පවල චිත්‍ර ඇඳ වෙනසට මුලපිරුවා. තවත් පිරිසක් පුරන් කුඹුරු අස්වැද්දුවා. එදා තැබූ විශ්වාසය සමග විප්ලවීය වෙනස වෙනුවෙන් යළි ඉදිරියට පැමිණෙන ලෙස ජනාධිපතිවරයා මේ සියලුදෙනාට ආරාධනා කළේය.

“සෞභාග්‍යයේ දැක්ම ප්‍රතිපත්ති ප්‍රකාශය අනුව දිවයින පුරා මාර්ග කිලෝමීටර් ලක්ෂයක් කාපට් අතුරා සංවර්ධනය කිරීමේ ව්‍යාපෘතිය ආරම්භ කෙරුණු අතර ඒ යටතේ වැඩ නිමකළ මාර්ග 1500ක් එකම දිනකදී ජනතා අයිතියට පත්කිරීම සනිටුහන් කරමින් මීගස්ආර, කුඩාබුබුල, කපුවත්ත මාර්ගය ඇමැති චමල් රාජපක්ෂ මහතා අතින් ජනතා අයිතියට පත් කළේය.

කොවිඩ් වසංගතය හමුවේ සංවර්ධන ව්‍යාපෘතිවල වැඩ නවතා දැමුවේනම් අද මෙලෙස මාර්ග 1500ක් විවෘත කිරීමට නොහැකි වන බව අගමැති මහින්ද රාජපක්ෂ මහතා සඳහන් කළේය.

මාර්ග කි.මි. ලක්ෂයක් සංවර්ධනය කිරීමේ වැඩසටහනේ දී ග්‍රාමීය හා වතු මාර්ග සඳහා ප්‍රමුඛතාව ලබාදී ඇතැයි පෙන්වා දුන් අගමැතිවරයා රට ගොඩනැගීමට ග්‍රාමීය මාර්ග පද්ධතිය සංවර්ධනය විය යුතු බව පැවසීය.

මාර්ග සංවර්ධනයට සමගාමීව ග්‍රාමීය ජනතාවගේ ආර්ථිකය නගාසිටුවිය හැකි වැඩපිළිවෙළ සම්බන්ධයෙන් රජය අවධානය යොමු කර තිබෙන බව ද අගමැතිවරයා සිහිපත් කළේය.

කුලුණු මතින් ඉදිවන කැලණිය නව ගුවන් පාලම සහ මධ්‍යම අධිවේගී මාර්ගයේ පළමු අදියර මේ වසර අවසන් වන විට ජනතා අයිතියට පත් කරන බව මහාමාර්ග ඇමැති ජොන්ස්ටන් ප්‍රනාන්දු සඳහන් කළේය.

මෙ රට සංවර්ධන කටයුතු වෙනුවෙන් ලෝක බැංකුව ඩොලර් මිලියන 500ක සහනදායී මුදලක් ලබාදීමට පියවර ගන්නා බව ලෝක බැංකුවේ දකුණු ආසියානු කලාපීය උප සභාපති, හාට්ව්ග් ෂෙෆර් මහතා විසින් සඳහන් කළේය

කැබිනට් සහ රාජ්‍ය ඇමැතිවරු, දකුණු පළාත් ආණ්ඩුකාරවරයා, පාර්ලිමේන්තු මන්ත්‍රීවරු, ජනතා නියෝජිතයෝ, ලෝක බැංකුවේ විදේශ නියෝජිතයෝ, අමාත්‍යාංශ ලේකම්වරු සහ නිලධාරිහූ ඇතුළු පිරිසක් මේ අවස්ථාවට එක්ව සිටියහ.

0 comment
0

Related Posts

Leave a Comment