Home ව්‍යාපාර පුවත් අදානි අද කොළඹට – ජනපති සමඟ හමුවක්

අදානි අද කොළඹට – ජනපති සමඟ හමුවක්

by Hela news

කොළඹ වරායේ බටහිර පර්යන්තයේ සංවර්ධන කටයුතු සඳහා ආයෝජනය කරනු ලබන ඉන්දියාවේ අදානි සමූහයේ සභාපති ගෞතම් අදානි මහතා අද (25) දින ශ්‍රී ලංකාවේ සංචාරයක නිරත වීමට නියමිත බව ඉන්දියාවේ ‘ද හින්දු’ පුවත් සේවය අනාවරණය කර සිටී.

මෙය පෞද්ගලික සංචාරයක් බවත් එහිදී ජනාධිපති ගෝඨාභය රාජපක්ෂ මහතා සමඟ බටහිර බහාලුම් පර්යන්ත ව්‍යාපෘතිය පිළිබඳව සාකච්ඡා පවත්වන බවත් ‘ද හින්දු’ වැඩිදුරටත් සඳහන් කරයි.

ඉන්දියාවේ අදානි සමූහය විසින් කොළඹ වරායේ බටහිර බහාලුම් පර්යන්තය (WCT) ඒකාබද්ධව සංවර්ධනය කිරීම සඳහා එහි දේශීය හවුල්කරු ජෝන් කීල්ස් හෝල්ඩින්ග්ස් (JKH) සහ ශ්‍රී ලංකා වරාය අධිකාරිය (SLPA) සමඟ ඉදිකිරීම, මෙහෙයුම් ක්‍රියාත්මක කිරීම හා අයිතිය පැවරීම (BOT) ගිවිසුමකට පසුගිය සැප්තැම්බර් 30 දින අත්සන් කෙරුණි.

මෙම ගිවිසුම ඇමරිකානු ඩොලර් මිලියන 700 ඉක්මවන ආයෝජනයකි.

ඊට අනුව කොළඹ වරාය බටහිර පර්යන්තයේ කොටස් හිමිකාරීත්වයෙන් 51% ක් අදානි සමාගමටත්, මෙරට නියෝජිත ජෝන් කීල්ස් හෝල්ඩිංග්ස් වෙත 34% ක් සහ වරාය අධිකාරිය 15% ක් ගිවිසුම අනුව හිමිවනු ඇත.

ශ්‍රී ලංකාවේ කොළඹ වරායේ බටහිර බහාලුම් පර්යන්තය සංවර්ධනය කිරීම හා එහි මෙහෙයුම් සඳහා කැබිනට් මණ්ඩලය විසින් ලබාදෙන ලද අනුමැතිය අනුව, ශ්‍රී ලංකා රජය වෙනුවෙන් වරාය හා නාවික අමාත්‍යාංශය සහ ශ්‍රී ලංකා වරාය අධිකාරිය විසින් නිකුත් කරන ලද අභිලාශය ප්‍රකාශ කිරීමේ ලිපියක් ඉන්දියාවේ විශාලතම වරාය හා කාර්ය සම්පාදන සමාගම සහ අදානි සමූහ ව්‍යාපාරයේ ප්‍රමුඛතම අනුබද්ධ සමාගමක් වන අදානි පෝට්ස් ඇන්ඩ් ස්පෙෂල් ඉකොනොමික් සෝන්ස් (Adani Ports and Special Economic Zones – APSEZ) සමාගම වෙත පසුගිය මාර්තු මාසයේ දී ලබා දී තිබුණි.

එම අනුමැතිය යටතේ අදානි පෝට්ස් සමාගම ශ්‍රී ලංකාවේ විශාලතම විවිධාංගීකරණය වූ සමූහ ව්‍යාපාරය වන ජෝන් කීල්ස් හෝල්ඩින්ස් පීඑල්සී සහ ශ්‍රී ලංකා වරාය අධිකාරිය සමග හවුල්කාරීත්වයකට එළඹෙනු ඇත. එමගින් රාජ්‍ය හා පෞද්ගලික අංශ අතර හවුල් ව්‍යාපෘතියක් ලෙස වසර 35 ක කාලයක් ආවරණය පරිදි කොළඹ වරායේ බටහිර පර්යන්තය ඉදිකිරීම, මෙහෙයුම් ක්‍රියාත්මක කිරීම හා අයිතිය පැවරීම (BOT) සිදුකෙරේ. මීටර් 1400ක් දිග නැංගුරම් ස්ථානයක් සමග මීටර් 20 ක ගැඹුරක් පවතින නිසා බටහිර පර්යන්තය ප්‍රතිනැව්ගත කිරීම් භාණ්ඩ මෙහෙයුම් සඳහා සුදුසුම පර්යන්තයක් වනු ඇති අතර එහි අතිවිශාල ප්‍රමාණයේ බහාලුම් නෞකා හැසිරවීමේ හැකියාව පවතී.

මෙම ව්‍යාපෘතිය මගින් බටහිර බහාලුම් පර්යන්තයේ බහාලුම් හැසිරවීමේ හැකියාව වර්ධනය වනු ඇති අතර ලොව කාර්යබහුලතම නෞකා ගමන් මාර්ගයක පිහිටි, උපායමාර්ගික වශයෙන් වැදගත් වරායක් ලෙස කොළඹ වරාය සතු වාසිසහගත තත්ත්වය තවදුරටත් ශක්තිමත් කරනු ඇතැයි අපේක්ෂා කෙරේ. කොළඹ වරාය යනු ඉන්දියානු බහාලුම් ප්‍රතිනැව්ගත කිරීම් කටයුතු සහ ප්‍රධාන නැව් ගමන් මාර්ගයේ නැව් මෙහෙයුම් කටයුතු වලදී වැඩිම ප්‍රමුඛත්වයක් හිමිවන කේන්ද්‍රස්ථානය වන අතර, කොළඹ වරායේ සමස්ත ප්‍රතිනැව්ගත කිරීම් වලින් 45% ක්ම ඉන්දියාවේ අදානි පෝට්ස් සමාගමේ පර්යන්තයක් වෙත යැවෙන හෝ ඒ වෙතින් පැමිණෙන ඒවා වේ.

0 comment
0

Related Posts

Leave a Comment