ශ්‍රී ලංකාවේ සෞඛ්‍යය හා අධ්‍යාපන යන අංශවල කැපී පෙනෙන දියුණුවක් ඇති බව එක්සත් රාජධානියේ Legatum ආයතනයේ අලුත්ම වාර්තාවේ සඳහන් වෙයි

0
82

ඉකුත් දශකය තුළ  ශ්‍රී ලංකාවේ අධ්‍යාපන හා සෞඛ්‍ය යන අංශයන්හි වර්ධනයක් පෙන්නුම් කරන බවත් එය ලංකාවේ සෞභාග්‍යයේ ඉදිරි ගමනට ඉවහල්වී ඇති බවත් Legatum ආයතනය සිය වාර්ෂික වාර්තාවෙන් පෙන්වා දී තිබේ. Legatum ආයතනය එක්සත් රාජධානියේ විශේෂඥ බුද්ධි මණ්ඩලයකින් සමන්විත වන අතර එමඟින් ලෝකයේ සියලු රටවල සියලු අංශවල සංවර්ධනය විශ්ලේෂණය කර වාර්ෂිකව වාර්තාවක් ප්‍රකාශයට පත් කරනු ලබයි. මෙම වසරේ විමර්ශන වාර්තාව ඉකුත් 20 දා ප්‍රකාශයට පත් කරමින් Legatum ආයතනයේ සභාපති ඇලන් මැක්කෝමික් සඳහන් කර ඇත්තේ ලොව රටවල් 147 ක් සෞභාග්‍යයතාවයේ උපරිමයට ලඟා වෙමින් සිටින බවය.

එක්සත් රාජධානියේදී මෙම වාර්තාව ප්‍රකාශයට පත් කෙරුනු අවස්ථාවට සහභාගී වූ එක්සත් රාජධානියේ ශ්‍රී ලංකා මහ කොමසාරිස් සරෝජා සිරිසේන සඳහන් කෙළේ ශ්‍රී ලංකාව 2009 වසරේ ත්‍රස්තවාදී යුද්ධය අවසන් කිරීමෙන් අනතුරුව අත්කරගත් ස්ථිරසාර සාමාකාමී වාතාවරණය පසුගිය දශකය තුළ ශ්‍රී ලංකාවේ ක්‍රමික වර්ධනයට තීරණාත්මක සාධකයක් වූ බවය. දශක හතකට වඩා වැඩි කාලයක් තිස්සේ ශ්‍රී ලංකාව නොකඩවා පවත්වාගෙන ගිය නිදහස් අධ්‍යාපනය හා නිදහස් සෞඛ්‍ය පිළිබඳ ප්‍රතිපත්තිද මෙම සෞභාග්‍යයේ වර්ධනයට පදනම වී ඇති බව ඇය සඳහන් කළාය.

Legatum ආයතනයේ ප්‍රතිපත්ති අධ්‍යක්ෂ ආචාර්ය ස්ටීවන් බ්‍රයන් කරුණු දක්වමින් ලගාටම් සෞභාග්‍යතා දර්ශකය ගෝලීය සෞභාග්‍යතාව තක්සේරු කිරීම සඳහා භාවිතාවට ගන්නා ආකාරය පැහැදිලි කරන ලදී. එම අවස්ථාවට එක්වෙමින් අප්‍රිකාවේ මෝ ඉබ්රහිම් පදනමේ නිර්මාතෘ ආචාර්ය මෝ ඉබ්රහිම්, ජීවවේදී සහ ලේඛක මැට් රිඩ්ලි සහ එක්සත් රාජධානියේ ජෝර්ජියා තානාපති සොෆීයා කට්සරාවා යන අයද අදහස් දැක්වීය.

Legatum සෞභාග්‍යතා දර්ශකය ගෝලීය දර්ශකයක් වන අතර එය 300කට අධික ජාතික මට්ටමේ දර්ශකයන් භාවිතා කරමින් ප්‍රතිපත්ති මූලික ව්‍යුහයන් 65ක් යටතේ ජාතීන් 167කගේ කාර්යය සාධන ප්‍රතිපත්ති විග්‍රහ කිරීම සිදුකරන අතර ආයතනික, ආර්ථික හා සමාජ සුරක්ෂිතභාවය පදනම් කරගත් ජාතික සෞභාග්‍ය විශ්ලේෂනාත්මකව මැන බැලෙන එකම ගෝලීය දර්ශකය වේ.

LEAVE A REPLY

Please enter your comment!
Please enter your name here